
لحد ما في مرة قالتلي الدكتور قال إن ممكن يكون عندي مشكلة بسيطة، بس مش عايزة أتكلم فيها. استغربت. مشكلة إيه؟ قالت حاجات تخصني يا ياسين. ساعتها حسيت إن فيه سر كبير نادين مخبياه عني. لكن ما كنتش أعرف إن السر ده مرتبط بجاسر الصرفي نفسه!
ولا كنت أعرف إن طليقها، اللي كانت طول الوقت بتتهمه إنه السبب في عدم خلفتها، هيكون بعد شهور أب لأسرة أنا اللي ضيعتها بإيدي. في نفس الوقت، ليلى بدأت تحس بمشاعر ناحية جاسر. كانت بتفتقد وجوده في الأيام اللي ما بتشوفوش فيها.
وبتفرح لما يطمن على البنات. وكان كل ما حد يذكر اسمه قدامها، تلاقي نفسها بتبتسم من غير ما تحس. وفي يوم، ملك دخلت عليها الأوضة وقالت ماما، هو عمو جاسر بيحبك؟ ليلى اتفاجئت. ليه بتسألي يا ملك؟
قالت علشان بيبصلك زي ما بابا كان بيبصلك زمان بس عمو جاسر عمره ما خلاكي ټعيطي. ليلى حضنت بنتها وسكتت. وبعدها بأسبوع، طلبت من جاسر ييجي يقابل أبوها. جاسر راح بيت عمي، وقعد معاه ومع أبويا اللي كان موجود وقتها.
ولما طلب إيد ليلى، عمي بص لبنته وسألها وإنتِ رأيك إيه يا بنتي؟ ليلى بصت لجاسر. وشافت في عينيه الاحترام اللي افتقدته، والأمان اللي كانت بتدور عليه. وقالت بصوت واطي أنا موافقة يا بابا. جاسر ابتسم ابتسامة عمره ما ابتسم زيها.
أما أبويا، فدموعه نزلت وهو بيقول ربنا يعوضك خير يا بنتي إنتِ تستاهلي كل خير. وتمت الخطوبة في قعدة عائلية بسيطة. وبعدها بفترة، اتكتب الكتاب. جاسر اتجوز ليلى، وبناتها بقوا عايشين معاها في بيته الكبير، بعد ما اتأكدوا إن حياتهم الجديدة هتكون مستقرة وآمنة.
وكان بيعاملهم بحنان واهتمام، من غير ما يحاول يمحي وجود أبوهم الحقيقي. ليلى لأول مرة من سنين كانت بتنام وهي مطمنة. ولأول مرة من سنين، كانت بتضحك من قلبها. لكن أنا ما كنتش أعرف أي حاجة عن الجواز ده.
لأن عيلتي كلها قررت تحترم رغبة ليلى في الخصوصية. لحد ما جه اليوم اللي مديري استدعاني فيه لمكتبه في الخليج. دخلت عليه، لقيته مبتسم وبيقولي مبروك يا ياسين! أخيرًا شركة الصرفي وافقت تدرس عرض الشراكة بتاعنا. ابتسمت بحماس. بجد يا فندم؟
قال أيوه، وعندنا اجتماع مهم جدًا في القاهرة الأسبوع الجاي مع الأستاذ جاسر الصرفي شخصيًا. قلبي دق بسرعة من الفرحة. الصفقة دي لو تمت، كانت هتخليني مدير إقليمي، وممكن تضاعف مرتبي. قلت اعتبر الصفقة تمت يا فندم.
لكن مديري كمل في حاجة لازم تعرفها جاسر الصرفي اتجوز قريب، ومراته بقت مديرة مكتبه، وهي اللي بتراجع كل مواعيده واجتماعاته المهمة. هزيت راسي من غير اهتمام. وقلت ربنا يهنيهم. ابتسم مديري وقال جهز نفسك، الاجتماع يوم الاتنين الساعة عشرة الصبح.




