
لكن لما لقتني ساكت، سألت يعني إيه هتتجوز؟ قلت يعني اتعرفت على واحدة، وقررت أتجوزها. وشها شحب. إنت بتحبها؟ ما رديتش. قامت من مكانها وقربت مني. بص في عيني يا ياسين وقولي إنت بتحب واحدة غيري؟ قلت بعصبية ما تكبريش الموضوع يا ليلى.
أنا مش هطلقك، وإنتِ هتفضلي مراتي وأم بناتي. ضحكت ضحكة قصيرة كلها ۏجع. يعني المفروض أفرح إنك هتسيبني على ذمتك؟ قلت أنا من حقي أتجوز، ومش بعمل حاجة حرام. ردت وهي بټعيط الحق ده مش معناه إنك تكسر قلبي وتظلمني!
أنا بقالي سنتين مستنياك، وبربي بناتك لوحدي، وإنت طول الوقت ده كنت بتجهز تتجوز غيري؟ حاولت أتهرب من عينيها. لكنها مسكت دراعي وقالت أنا قصرت معاك في إيه؟ السؤال ده كان أصعب من أي عتاب. لأن الحقيقة إنها ما قصرتش في حاجة.
أنا اللي قصرت. أنا اللي خنت العهد. وأنا اللي قررت أهدم البيت اللي هي قضت عمرها تبنيه. لكن بدل ما أعترف، قلت ببرود الموضوع مش متعلق بيكي. أنا أخدت قراري. سابت دراعي ورجعت خطوتين لورا. وبصوت مكسور قالت طيب وأنا وبناتك؟ قلت مش هقصر في مصاريفكم.
حطت إيدها على قلبها وقالت إحنا مش فاتحين جمعية يا ياسين علشان كل اللي يهمنا المصاريف! إحنا عيلة وإنت أب وجوز، مش ماكينة فلوس! وساعتها، لأول مرة في حياتنا، ليلى طلبت مني أسيب الأوضة. الأيام اللي بعدها كانت صعبة. ليلى حاولت تقنعني أراجع نفسي.
كلمت أبويا، وأمي، وعمي. كلهم وقفوا ضدي. أبويا قال لي إنت عايز تتجوز علشان إيه؟ مراتك مقصرة معاك؟ قلت لا. وحشة العشرة؟ لا. مش مربية بناتك كويس؟ بالعكس. ضړب أبويا كف بكف وقال أمال عايز تهد بيتك ليه يا ابني؟ ما عرفتش أرد. أما عمي، فكان موقفه أشد.
وقف قدامي وقال ليلى بنتي يا ياسين، وأنا ائتمنتك عليها. لو مش قادر تعدل وتراعي ربنا فيها، سيبها تعيش بكرامتها. وقتها اتعصبت وقلت إنتوا كلكم واقفين ضدي ليه؟ رد عمي إحنا مش ضدك إحنا ضد ظلمك. ليلى سمعت الكلام ده كله. ومن اليوم ده اتغيرت. بطلت ټعيط قدامي.
بطلت تسألني عن نادين. بطلت حتى تحاول تقنعني. بقت بتعمل اللي عليها في البيت، وتتكلم معايا في الضروري وبس. وفي ليلة، لقيتها قاعدة جنب مريم وهي نايمة. كانت بتمسح على شعرها وبتعيط من غير صوت. وقفت عند الباب وقلت ليلى، إنتِ لسه زعلانة؟
رفعت وشها وبصتلي. وقالت جملة عمري ما نسيتها أنا مش زعلانة منك يا ياسين أنا زعلانة على نفسي. علشان ضيعت عشر سنين وأنا فاكرة إن ليا مكان في قلبك محدش يقدر ياخده. وبعدين كملت بس خلاص أنا تعبت من إني أحارب لوحدي علشان راجل مش عايزني.
ما رديتش. خرجت من الأوضة، وأنا بحاول أقنع نفسي إنها مجرد فترة وهتعدي. رجعت الخليج بعد أسبوعين. يوم السفر، البنات كانوا نايمين. ولما ليلى خرجت تودعني، لقيتها واقفة عند باب الشقة. قلت خلي بالك من البنات. ردت حاضر. استنيت تقوللي هتوحشني، أو تسألني إمتى هرجع.



