— لما يتطمن على أخته.
— بس لسه قدامها خمس سنين.
— وأنا فاهم إنه هيستنى.
— على الأقل أخطبله.
— قدامك مين؟
— اللي قدامك.
— طيب قولي.
— قول إنت الأول.
وفي نفس اللحظة قالوا:
— آليا!
وضحكوا سوا.
قال يحيي:
— بنت حلال وتستاهل كل خير، وفاهم إنها بتحبه.
ابتسمت فريدة:
— فاهم إنت كنت نفسي في إيه؟
— إيه؟
— إني أشوفك مبسوط.
قال يحيي:
— أنا مش مبسوط بس، أنا طاير من الفرحة. أنا مش قادر أوصفلك السعادة اللي أنا فيها. دي حاجة طول عمري بتمناها. مكنتش متخيل إنها تتحقق. ده كان حلم بالنسبة لي.
ضحك من شدة فرحته.
— أنا عاوز أطير! أنا مش عارف أعمل إيه!
بدأ يضحك بسعادة هستيرية.
كانت أول مرة فريدة تشوف يحيي بالشكل ده، لدرجة إنها خافت عليه من شدة الفرحة.
— اهدى يا حبيبي.
ابتسم يحيي وقال:
— إحساس جميل أوي إن العوض يجيلك من الشخص اللي بتحبه، وإن الحاجة اللي محتاجها وبتحلم بيها تيجي من الشخص اللي بتحبه. العوض جميل أوي وليه فرحة تانية.
سكت، ودموعه لمعت.
— فرحة بعياط ودموع، مع زيادة شغفك بالحاجة دي.
وبص لفريدة:
— أنا فعلًا مكنتش عاوز حاجة من الدنيا غيرك. أنا لما صدقت أكون معاكي، بس كان نفسي في طفل منك يكون على اسمي.
ابتسمت فريدة:
— بجد؟
— آه.
— أنا فرحانة أوي.
— أنا هروح أكلم أحمد وأقوله.
قرر يحيي إنه يعمل حفلة كبيرة، وجمع فيها كل اللي يعرفهم وكل القريبين منهم، احتفالًا بالخبر.
كان مبسوط إن هيكون عنده أخ من عمو يحيي، وفارس ومي فرحوا كمان.
جت آليا وكانت في قمة أناقتها.
قربت نور من يحيي وقالت:
— بص.
— إيه؟
بص ناحية عينيها، وشاف آليا.
وسرح فيها وفي جمالها الهادي اللي كان بيخطفه دائمًا.
قالت نور:
— مش ناوي بقى تفرحني بيك؟
— مش دلوقتي.
— كده يا يحيي؟
— إنتِ عاوزة إيه؟
— عاوزاك تتجوز آليا.
— مين قالك إني هسمع كلامك؟
— كفاية إن عينيك مليانة حب. أجيبلك إيه أكتر من كده؟
— نور، أعقلي.
— طيب ريحني.
— استني، هعملها مفاجأة.
— إمتى؟
— يوم التخرج.
— تخرج مين؟
— هقولك بعدين.
— تاني يا يحيي؟
— خلاص بقى، روحي شوفي أحمد بينادي عليكي.
مشت نور، فقالت آليا ليحيي:
— نعم؟
ابتسم وقال:
— بحبك.
ردت وهي مبتسمة:
— وأنا بموت فيك يا أبو آدم.
— آدم؟
— أيوه يا حبيبتي، ابننا.
— أنا مبسوط أكتر منك. أنا أول مرة أفرح كده.
—
مر حوالي خمس شهور على الحفلة دي.
وكان يوم الكل مستنيه.
يوم حفلة التخرج.
دخل يحيي على نور.
— نور.
— نعم؟
— عاوز أقولك حاجة، ومفاجأة في نفس الوقت.
— إيه؟
— النهارده يوم التخرج.
فتحت عينيها:
— بجد؟ يعني إنت كان قصدك على اليوم ده؟
— أيوه بالظبط.
وحكالها على كل اللي هيعمله.
— دلوقتي أنا هروح الحفلة، وإنتِ ظبطي الدنيا هنا. أنا قايل لماما وعمو يحيي وباباها ومامتها كل حاجة.
ومد لها فستانًا:
— وخدي الفستان ده وخليها تلبسه.
— ماشي.
ضحك يحيي:
— أنا لو بعرف أزغرط كنت زغرطت.
ضحكت نور:
— ههههه، ماشي يا أخويا.
مشي يحيي.
ونور اتصلت بآليا وقالتلها تيجي.
وظبطت الدنيا.
أما يحيي، فراح الحفلة وكان مبسوط جدًا.
النهارده أحلامه هتتحقق.
هيكمل حياته مع الإنسانة اللي حبها طول عمره.
أصحابه جم عليه:
— أخيرًا شوفناك يا عم يحيي.
— أعمل إيه؟ الشغل واخد كل وقتي.
— طيب وهتشغلنا ولا هتخلي بينا؟
— عيب عليكوا. مكانكوا محفوظ.
— المهم، أنا عاوز مساعدتكوا.
وحكالهم على اللي عاوز يعمله.
وقرروا يساعدوه.
بدأت الحفلة، والكل اتجمع.
عيلة يحيي جت، ونور وآليا وأحمد، وعيلة آليا كمان.
بدأ العميد ينادي الأسماء.
— الأول على الدفعة، والحاصل على تقدير عام امتياز… يحيي حسن الشربيني.
يحيي اتفاجئ.
مكنش يتخيل إنه ياخد المستوى ده.
طلع على المنصة، وأخد الشهادة.
قال له العميد:
— مبروك عليك لقب الدكتور. شرف لينا إنك تكون معانا في هيئة التدريس.
ابتسم يحيي:
— الشرف ليا أكتر.
ووقف يقول كلمة:
— أنا مبسوط جدًا النهارده على اللي وصلتله. بعد مشوار طويل، ربنا حققلي كل أحلامي. وناقص حلم واحد… إني أعمل المستشفى اللي بحلم بيها، واللي هيمسكها إن شاء الله أختي ومراتي المستقبلية.
الكل بص له بفرحة.
وأصحابه سقفوا جامد.
نزل يحيي من على المنصة وقرب من آليا.
وقف قدامها وقال:
— هتكوني زوجتي المستقبلية؟
بصت له وعينيها بتلمع، والضحكة على وشها، وكانت مكسوفة.
بصت لنور، وبعدين لأبوها.
هز أبوها رأسه بالموافقة.
هزت آليا رأسها بالموافقة.
مسك يحيي إيدها ولبسها الخاتم.
فريدة من فرحتها زغرطت.
قال يحيي:
— مبروك عليكي أنا يا زوجتي المستقبلية.
وانتهت الحفلة باحتفال كبير وفرحة ليحيي وآليا، اللي كان الحب باين في عينيهم.
—
بعد أربع شهور كمان…
— يحيي! يحيي! الحقني!
— إيه؟ في إيه؟
— آااه! بولد! الحقني!
قام يحيي مفزوع، وشالها وخدها على المستشفى.
وكلهم راحوا وراه.
فريدة مع كل صرخة منها كان قلب يحيي بيتقطع.
كان خايف عليها جدًا.
ورغم إن الولادة كانت صعبة، إلا إن صوت عياط الطفل اللي خرج من أوضة العمليات ريّح قلوب كتير، وخلى وشوشهم كلهم تسترخي من الفرحة.
خرجت الممرضة وهي فرحانة وشايلة الطفل اللي خطف كل قلوبهم.
— ألف مبروك! جالكم ولد زي القمر.
— وفريدة عاملة إيه؟
— شوية وهتخرج، هي كويسة.
— الحمد لله.
قرب أحمد من نور:
— عقبالنا.
— إن شاء الله.
— لا، قريب.
وغمزلها.
وقرب يحيي من آليا:
— عقبالنا بقى إحنا كمان.
— إن شاء الله.
— قريب.
وغمزلها.
خرجت فريدة من المستشفى، والكل كان فرحان بالمولود.
وعملوا له سبوع كبير، وكان يوم مميز جدًا للعيلة كلها.
—
بعد سنتين…
فارس ومي خلصوا الثانوية.
فارس دخل الحربية، ومي دخلت طب.
وجاء اليوم اللي كلنا مستنيينه.
يوم الفرح.
أحمد ونور.
ويحيي وآليا.
قرروا يعملوا الفرح في يوم واحد.
كانوا الاتنين متألقين بالفستان الأبيض، ويحيي وأحمد كانوا في قمة الجاذبية بالبدلة السوداء.
وكان يوم كل تفاصيله جميلة.
وفي نهاية اليوم، اتصورت العيلة كلها صورة واحدة.
عيلة بدأت بأشخاص كانوا في يوم من الأيام لوحدهم، وبقت دلوقتي عيلة كبيرة مليانة حب وضحك ودفا.
بعد ما كانوا جايين إسكندرية لوحدهم، بقوا عيلة كبيرة، وكلهم موجودين في صورة واحدة.
الصورة كانت بتجمع قلوب بتحب بعض، مفيش فيها كره ولا حقد.
قد إيه العوض والنصيب بتقدير وحكمة ربنا جميل أوي.
وكمان بالرضا بالمقسوم والنصيب.
وكفاية إن كل ده يوصلك إنك تكون وسط ناس بالضحكة الصافية دي.
**الرواية خلصت.**
وفي النهاية، عاوزة أقول شكرًا لكل حد دعمني، ولكل حد قالي “كملي”، لأن من غير تشجيعكم عمري ما كنت هعرف أكمل.
**النهاية.**
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
