كان نفسه أبوه يتغير. كان نفسه يبقى ليه أب زي باقي الناس، أب مثالي يفتخر بيه.
لكن نصيبه كان إن أبوه يكون بالشكل ده، وفي الآخر ينتهي به الأمر إلى تنفيذ الحكم عليه.
خرج يحيى لهم ووشه مرهق.
يحيي الكبير لاحظ عليه، لأنه أصلًا بيعرفه من نظرة.
قرب منه:
— مالك؟
— النهارده الحكم هيتنفذ.
سكت لحظة وقال:
— كان نفسي الظروف تتغير وتكون في صالحنا، بس للأسف كل حاجة . مابقاش في فرصة خلاص.
رد يحيي الكبير:
— أنا فاهم إن كل كلمة كنت بتقولها كانت من ورا قلبك، بس أي حد بيغلط لازم ياخد جزاءه.
— الجزاء من العمل.
— صح ولا لأ؟
— صح. الجزاء من جنس العمل. ربنا يسامحه.
ثم قال يحيي:
— متقولش لماما حاجة. أنا لما صدقت إنها نسيت اللي حصل معانا. أنا عارف إنك بتحبها. ربنا يخليكوا لبعض يا رب.
—
بعدها خرجت مي مع نور، وكان شكلها جميل بعد التغيير.
فارس صالحها، وخلاص بقت واحدة منهم وعاشت معاهم.
يحيي دخلها مدرسة خاصة، واتعلمت كل حاجة من أول وجديد، وكانت متفوقة جدًا في المدرسة.
نور كانت بتساعدها، وكانت فرحانة بيها جدًا، لأنها طول عمرها كانت بتتمنى يكون ليها أخت.
نجحت نور في الثانوية بنسبة ٩٨٪، ومعاها آليا اللي حصلت على ٩٧٪.
الاتنين كانوا فرحانين جدًا، ودخلوا مع بعض كلية الطب.
عدت سنة وهم في الكلية، وكلهم كانوا سعداء.
فارس ومي بقوا قريبين جدًا من بعض، وبقى فارس معاها في كل حاجة.
أما فريدة، فكل يوم كان حبها ليحيي بيزيد، وهو كمان.
عاشوا مع بعض عشرة كبيرة، والحب ملى حياتهم، والاهتمام والاحترام كانوا أساس علاقتهم.
كانوا زوجين مثاليين، وكمان أب وأم لأربع أولاد بيحبوهم.
—
أحمد اتقدم لنور، ويحيي وافق.
وجه اليوم اللي هيقعد فيه معاها.
فريدة صحيت نور:
— اصحي يا نور. إنتِ هتفضلي نايمة كتير كده؟
— إيه يا ماما؟ في إيه؟
— في عريس متقدملك، وأخوكي موافق، وأنا موافقة، ويحيي موافق.
— آه، وفارس ومي؟ إيه الأخبار؟ مش معترضين؟
— معرفش، ابقي اسأليهم.
— طيب يلا يا ماما اخرجي واقفلي الباب والنور، وسيبيني أنام. أنا لما صدقت أخد الإجازة.
— طيب والناس اللي جاية دي؟ إنتِ هبلة؟
— قولي لهم مش موجودة، أو أقولك… قولي لهم مش موافقة. أنا عاوزة أتعلم وآخد شهادة كبيرة، مش عاوزة أتجوز.
كانت فريدة عارفة إنها بتحب أحمد، لأنها كانت قالت لها، وكمان عينيها كانت بتفضحها كل ما أحمد ييجي عندهم.
قالت فريدة بمكر:
— خلاص يا بنتي، اللي تشوفيه. أنا هروح أتصل بأحمد وأقوله نور مش موافقة، وربنا يرزقه ببنت الحلال.
أول ما سمعت نور اسم أحمد، قامت بسرعة من على السرير.
— ماما استني! إنتِ قصدك أحمد مين؟
— أحمد صاحب أخوكي اللي كان بيدرسلك. أنا فاهمة إنه كبير عليكي، يلا محصلش نصيب. هروح أتصل بيه وأقوله إنها ملتفتة لدراستها.
— لا استني يا ماما بالله عليكي. أنا هعتزل الدراسة أصلًا!
ضحكت فريدة:
— أنا كنت بهزر معاكي! مالك قموصة كده؟
— يعني… هو جاي وهيكون لابس إيه؟
ضحكت فريدة عليها:
— إنتِ مجنونة.
كانت فاهمة إن أول ما تعرف إن أحمد جاي، هتعمل كده.
وبالليل جه أحمد وعيلته، وكان في قمة الشياكة.
نور كانت متوترة جدًا.
ده حب حياتها اللي جاي يتقدم لها!
اتصلت بآليا علشان تطمنها، لدرجة إن آليا زهقت منها، لأنها كل شوية تكلمها وتقول لها إنها متوترة ومش متخيلة إن ده كان ممكن يحصل.
كانت فاكرة إنه مجرد مدرسها.
قعد يحيي ويحيي الكبير مع عائلة أحمد، ونور كانت جوا.
قرب أحمد من يحيي وقال:
— أنا مبسوط أوي إني قاعد هنا. إنت مش فاهم يا يحيي أنا بحبها قد إيه.
غمز له يحيي:
— آه، فاهم.
ضحك أحمد:
— بجد يا يحيي؟
— عيب عليك. دي تربيتي.
— يا رب يا يحيي.
— يلا، ربنا يتممها على خير.
خرجت نور وهي مكسوفة جدًا، وكانت عاوزة الأرض تنشق وتبلعها. وكانت مي معاها.
همست لها مي:
— متهدي يا بنتي. إنتِ كنتِ عاملة نفسك مش بتحبيه.
— بس يا بت.
— متخلنيش أقول قدامهم كلهم إنك بتحبيه.
— لا يا مي، بالله عليكي.
قالت فريدة:
— مالك يا نور؟
— متوترة أوي. مش متخيلة اللي بيحصل ده.
وصلت عندهم، ويحيي حس بتوترها، فقام ووقف جنبها وبصلها بنظرة مطمئنة.
جميل جدًا إن يكون عندك أخ بيحبك، وسندك وضهرك، ويقدر يطمنك بنظرة أو كلمة.
وده كان يحيي بالنسبة لنور.
هديت شوية، وقعدت جنب يحيي.
قال يحيي الكبير:
— يلا يا جماعة نسيبهم لوحدهم.
قاموا كلهم وقعدوا بعيد عنهم شوية.
قال أحمد:
— هتفضلي مكسوفة وباصة في الأرض كتير؟
— احم… أنا…
ضحك أحمد:
— إنتِ إيه؟ أنا فاهم إنك مكسوفة ومش متخيلة الموقف. بس أنا هنا جاي علشان أتجوزك، مش جاي أسألك سؤال في الفيزياء.
ضحكت نور.
— أيوه كده، خلي الشمس تطلع.
— شكرًا يا مستر أحمد.
— إيه؟ في شكر ومستر كمان؟ على فكرة أنا جاي أتجوزك، مش جاي أديكي حصة.
— أمال أقول إيه؟
— متقوليش. أنا اللي هقول.
وبدأ يتكلم:
— بصي يا ستي، أنا معجب بيكي من زمان. من ساعة ما كنت بديكي في المدرسة، من أول يوم شوفتك فيه وأنا معجب بيكي، وقلب معايا بحب مع الوقت. وعلى فكرة، أخوكي كان فاهم من زمان، بس كنت مستني الوقت المناسب علشان أقعد القعدة دي. ها، إيه رأيك؟ تتجوزيني؟ ولا هتقولي عليا أكبر منك بعشر سنين؟
ابتسمت نور:
— عمر ما كان السن عقبة في أي حاجة. أهم حاجة الراحة النفسية.
ابتسم أحمد:
— يعني إيه؟ موافقة؟
هزت رأسها بالموافقة.
فرح أحمد جدًا ونادى على يحيي.
جاءوا وقعدوا، وقرأوا الفاتحة، ونور كانت مبسوطة جدًا، وكلهم كانوا فرحانين.
قربت نور من يحيي:
— مش ناوي تفرحني بيك بقى؟
— آه، ناوي. بس مش دلوقتي.
— أمال إمتى؟
— في حفلة التخرج.
وغمزلها.
نور مكنتش فاهمة كلامه.
فضلت واقفة تفكر:
“حفلة تخرج مين بالظبط؟”
أحمد شافها تايهة، فعرف إن في حاجة.
— في إيه؟
— أصل خلاص مفيش يا مستر.
— مستر تاني؟ اسمي أحمد.
— والله ممكن تنسى إني كنت بدرسلك؟
— حاضر، هحاول.
— طيب قولي أحمد كده.
— احم… أحمد.
— الله! أحلى أحمد دي ولا إيه؟
جاء يحيي من وراهم ومسك أحمد.
— لا يا حبيبي، مفيهاش من كده. لما تعوز تعاكسها استأذني الأول.
ضحك أحمد:
— يا شيخ، مش هتبقى مراتي؟
— اعقل أحسن أرجع في كلامي.
— لا خلاص، أنا لما صدقت.
—
عدى على اليوم ده حوالي سنة.
أحمد ونور قربوا من بعض أكتر.
وكل ما نور تسأل يحيي:
— مش هتفرح بيك؟
يرد:
— يوم التخرج.
كانت تسأله:
— تخرج مين؟
وهو يضحك:
— مش فاهم.
دخل فارس الثانوية، وكان حلمه قدامه إنه يدخل الحربية ويبقى ضابط.
ومي كانت معاه في المدرسة.
الاتنين كانوا مع بعض خطوة بخطوة، وبيساعدوا بعض في المذاكرة.
يحيي الكبير كان مبسوط جدًا بوجودهم في حياته.
كان قاعد مع فريدة بيتفرجوا على التليفزيون.
قالت فريدة:
— عاوزة أجوز يحيي بقى وأفرح بيه.
بصلها يحيي:
— بتفكري في اللي أنا بفكر فيه؟
— بس أنا فاهمة إنه مش عاوز دلوقتي.
— وأنا فاهم هو عاوز إمتى.
— إمتى؟
