موضوع الموتور والخمسة آلاف جنيه في لحظة بقى أهون حاجة في الدنيا قدام المصيبة اللي بتترمي على شرفي!
دموعي نزلت غصب عني من القهر والظلم، زعقت بأعلى صوتي:
“حرام عليكم! اتقوا الله في الست الغلبانة وعيالها اليتامى! راجل مين اللي دخل عندي؟ أنا قافلة عليا بابي من المغرب ومشوفتش الشارع! إنتِ عايزة تخربي بيتي وتطلعي عليا سمعة عشان تطرديني؟”
سماح حطت إيدها في وسطها وقالت ببرود:
“طب وحياة ولادي دول، الفجر لما صحيت على صوت كركبة في المدخل، لمحت خيال واحد نازل من عندك ولما حس بيا جري وفتح باب الشارع! والكهربا قطعت في نفس اللحظة والموتور شاط!”
الناس بدأت تقرب، وحمايا مكنش سامع ولا
شايف، مسكني من طرحتي وكان هيمد إيده عليا قدام عيالي اللي كانوا طلعوا على صوت الدوشة وواقفين فوق على السلم بيصرخوا:
“ماما! متضربش ماما يا جدو!”
في اللحظة دي بالظبط، اتفتح باب المدخل ودخل “عم إبراهيم” الكهربائي اللي كانوا باعتين يجيبوه من الصبح عشان يشوف الموتور.
راجل عجوز ومحترم ومتربي مع حمايا في نفس الشارع.
عم إبراهيم شاف المنظر، دخل زاح حمايا عني وزعق:
“استهدى بالله يا حج محمود! إيه اللي بيحصل هنا وعيب تفضحوا نفسكم قدام الغريب والقريب بالشكل ده!”
حمايا وهو بينهج: “الحقيرة دي حرقت الموتور، وكمان بتدخل رجالة في بيتي!”
عم إبراهيم بص للكل بنظرة استنكار وقال:
“اتقِ الله يا راجل في أم عيال ابنك ومترمش المحصنات.. سيبك من الكلام الفارغ ده وتعالى شوف المصيبة اللي بجد!”
الكل سكت فجأة، وحمايا سأله وهو مستغرب:
“مصيبة إيه؟ الموتور ماله؟”
عم إبراهيم شاور على أوضة الموتور
الصغيرة اللي تحت السلم وقال بصوت مريب:
“الموتور متحرّقش بسبب قفلة ولا أوتوماتيك علّق يا حج… الموتور ده ملعوب فيه ومسكوب عليه جاز من برة ومولع فيه بفعل فاعل! وفوق ده كله، أسلاك لوحة الكهربا مقطوعة ببنسة مخصوص!”
السكوت خيم على المدخل كله لدرجة إننا بقينا سامعين أنفاس بعض.
الكهربائي كمل كلامه وبص في وشوش الناس كلها:
“واللي عمل العملة دي كان قاصد العمارة كلها تولع، ومش بس كده… البنسة اللي اتقطعت بيها الأسلاك واقعة جوة الأوضة، وعليها مفتاح!”
بصيت لسماح لقيتها وشها أصفر زي الليمونة، ورجعت خطوة لورا وهي بتخبي إيديها ورا ضهرها.
حمايا قرب من البنسة والمفتاح اللي عم إبراهيم مطلعهم في إيده…
وفجأة، اتجمد مكانه وصرخ صرخة هزت العمارة كلها لما شاف المفتاح!#حكايات_منــال_عـلـي
المفتاح مكنش غريب…
لكن اللي مسك المفتاح ده قبل الليلة دي بساعات هو اللي قلب الموازين كلها، وخلاني أعرف
إن موتي وموت عيالي كان مخطط له من أقرب الناس لينا!
حمايا فضل مبحلق في المفتاح اللي في إيد عم إبراهيم، وعينيه كانت بتخرج منها شرار، بس المرة دي الشرار مكنش موجه ليا… كان موجه لـ “سماح”!
المفتاح كان متعلق فيه ميدالية نحاس قديمة، محفور عليها اسم “يوسف”.. ابن سماح البكري! ميدالية مفيش زيها في العمارة كلها، ومستحيل حد يغلط فيها.
حمايا نطق بصوت مرعوب وواطي من هول الصدمة: #حكايات_منــال_عـلـي
“مفتاح شقتك وميدالية ابنك يا سماح؟! البنسة دي والمفتاح ده بيعملوا إيه في أوضة الموتور تحت؟!”
سماح وشها جاب ألوان الطيف كلها، واتسمرت مكانها، وبدأت تبلع ريقها بصعوبة وتتلعثم:
“أنا… أنا معرفش يا حمايا! المفتاح كان ضايع مني من يومين، وتلاقيه… تلاقيه الواد يوسف وهو بيلعب رماه هناك! ولا يمكن نادية هي اللي سرقته عشان تلبسني المصيبة دي وتنتقم مني؟!”
عم إبراهيم الكهربائي هز راسه بأسف وزعق فيها قدام الجيران:
“اتقي الله يا ولية وبطلي فجر! هو يوسف ابنك الصغير ده هو اللي هينزل بعد نص الليل يفك مسامير اللوحة ببنسة جوزك ويدلق جاز على الموتور؟ وبعدين شوفي إيديكي كده وريحة هدومك اللي فايحة جاز وهباب أسود من شكمان الموتور!
إنتِ فاكرة إنك ناصحة وعارفة تفصلي السلك عشان تشيطيه، بس من غبائك طيرتي السكينة كلها، ولما اتفزعتي من الشرارة المفتاح وقع منك في الضلمة ومعرفتيش تجيبيه!”
الكلام نزل زي الصاعقة على دماغ كل الواقفين.
الجيران اللي كانوا من شوية بيبصولي بقرف وشك، نظراتهم اتحولت فجأة لسماح، وبدأت الهمهمات تعلى: “يا ساتر يا رب.. بتتبلى على شرف الغلبانة وهي اللي قاصدة تولع في البيت؟!”
في اللحظة دي، شريط الأيام اللي فاتت كلها مر قدام عيني زي البرق.
افتكرت كلامها لحمايا الأسبوع اللي فات وهي بتزن عليه: “نادية وشقتها واكلين حقنا، والشقة دي المفروض ابني أولى بيها لما يكبر.. إنت سايبها قاعدة تتهنى ليه؟”
وافتكرت اللمبة اللي كانت منورة في الموتور ومارضيتش تطفي.. كانت هي اللي بتلعب فيه من تحت ومثبتة السلك عشان يسخن ويولع!
قربت منها وأنا مش حاسة برجليا، بس القهرة اللي في قلبي اتحولت لقوة عمري ما حسيتها في حياتي، وبصيت في عينها مباشرة وقلت بصوت جهوري سمّع العمارة والشارع:
“الشرف اللي حبيتي تدوسيه برجلك عشان تطرديني أنا وتلات يتامى من بيت أبوهم، ربنا حماه في ثانية وخلاكي تفضحي
نفسك بنفسك! خيال الراجل اللي شوفتيه نازل من عندي ده كان خيال شيطانك إنتِ وإنتِ نازلة في الضلمة تدلقي الجاز عشان تموتينا كلنا!
كنتِ عايزة تلبسيني خمسة آلاف جنيه تعجيز، ولما خفتي الناس تتعاطف معايا، روحتي طاعنة في شرفي عشان حمايا يرميني بهدومي في الشارع وتاخدي الشقة؟ هان عليكي لحم جوزي اللي مات وهو بيعاملك زي أخته؟”
