النعش كان ثابت مش راضي يدخل المسجد.
كلنا فكرنا الست دي عملها غير صالح.
جارتنا كانت عايشة لوحدها وابنها كان مسافر، وجالها مرض خبيث ومقالتش لابنها عليه عشان مينزلش من شغله ويعرف يبني حياته، لإنه يتيم من صغره ومحدش كان بيساعده، محدش كان بيقوله:
أنت محتاج إيه؟ أنت كويس!
صحينا في يوم على وفاة والدته، هي كمان كان الموضوع صعب جدًا. أهل البلد رنوا كتير على رقم ابنها، بس كان بيديهم مغلق!!
فمكنش قدامهم حل غير إنهم يكفنوها ويدفنوها.
ولما وصلوا بيها المسجد، النعش مدخلش. الرجالة فضلت تقول:
لا إله إلا الله
وتكررها ولكن بدون فايدة!
قعدوا قدام المسجد ويرنوا على مشايخ، ومكنش فيه أي حلول.
حاولوا يسألوا جيرانها:
هي كان لسانها سليط؟
طيب كانت مبتصليش أو ما شابه؟
كان الرد:
لا، دي بتقيم الليل كله.
قعدوا حوالي أربع ساعات على نفس الشيء، فيه اللي رجع بيته، وفيه اللي فضل واقف يدور على حلول.
شوية والنعش اتحرك لليمين. استغربوا وبصوا حواليهم تجاه الحركة، لقوا ابنها جاي يجري وهو بيعيط ومنهار.
فضل في نعشها ويقول:
بقالي أيام تليفوني بايظ يا ما، ولما أفتحه عشان أطمن عليكي تكوني مشيتي.
الشاب فضل يعيط بشكل مش طبيعي، لدرجة الناس كلها قعدت تعيط علشانه. فضل يقول كلام كتير، ولما خلص اللي في قلبه، أمه دخلت المسجد بمنتهى الخفة اللي في الدنيا.
كانت لا تملك في الدنيا غيره، وكأنها بتقوله:
أنا كنت مستنياك عشان أودعك.. أصلك كنت واحشني.
سلام على من رحلوا عن الدنيا، ولهم في قلوبنا حنين لم يكف يومًا عن مناداتهم لعناق يشبع نزيف رحيلهم.
### القصة الثانية
يقول صاحب القصة:
بابا اتجوزها بعد وفاة أمي بشهرين. عمري وقتها كان 6 سنوات. كرهت بابا وكرهتها قبل ما تدخل بيتنا، وكرهتها أكتر بعد ما دخلته، برغم إن عمرها ما عاملتني بطريقة مش كويسة، بالعكس كانت بتهتم بيا وبتراعيني زي ما تكون أمي.
وكل شوية كنت بعرف عنها حاجة. عرفت إنها اتطلقت علشان مكانتش بتخلف، وبابا اختارها علشاني أنا، علشان مش عايز ابن أو بنت ينافسوني في حبه ليا.
الأيام عدت بسرعة رهيبة، وبابا كان دايمًا مشغول، وهي دايمًا اللي موجودة قدامي.
ذكريات دراستي كلها عبارة عن دخولي البيت وريحة الأكل اللي بحبه مالية الصالة، وهي تخرج من المطبخ بتضحك وهي بتسألني:
عملت إيه النهارده؟
ولازم كل مرة أرد رد سخيف عليها، وهي تتجاهل سخافتي تمامًا وترجع المطبخ علشان تحضرلي الغدا عقبال ما أغسل إيديا.
عشرين سنة علمت نفسي أكرهها. عمري ما قلتلها يا ماما، وعمري ما ناديت عليها أصلًا لأنها كانت دايمًا قدامي.
بابا تعب وفارق الحياة فجأة، وفضي البيت عليا وعليها، فحسيت إن وجودي معاها غلط، مع إنه مفرقش كتير عن وقت وجود بابا اللي مكنش موجود.
بلغتها إني قررت أسيب البيت وأستقل بحياتي.
مفهمتش…
