روايات وقصص

مزعجة للكاتب/ أحمد محمود شرقاوي

بدأت أفتش في دولابها، عبارة عن أكتر من إسدال وأكتر من نقاب وريحة المُسك في كل مكان ومعرفش مصدرها، سجادة الصلاة مفروشة والمُصحف محطوط، واضح إنها رغم صغر سنها كانت متدينة بزيادة، وأنا مش هسرق إسدال ولا مصلية ولا مُصحف، البنت أوضتها وكأنها مسجد..

ومش إيماني إللي منعني من السرقة، بس كل الحاجات دي مش هتنفعني أصلًا، وقبل ما أكفنها شوفت حاجة زغللت عنيا، شعر البنت عامل زي الحرير، يمكن أنعم من الحرير، وأنا شعري تقريبًا عامل زي سِلك المواعين، معرفش ليه حسيت إنه هيكون فأل حسن لو خدت خُصلة من شعرها احتفظت بيها، لعل وعسى تبهت عليا وشعري يبقا أحسن، خاصة إني وحشة وشكلي وحش بشهادة كل الناس، وغير شغلي كمان فكل الشباب عزفوا عن الزواج بيا تمامًا..

وبدون تفكير خدت منها خصلة شعر وكملت شغلي وانتهيت ورجعت بيتي، فضلت لحد الفجر تقريبًا بتفرج على خصلة الشعر، بتخيل نفسي في جمال البنت دي، وفي شكلها، وشعرها زي شعري، تخيلات كتير أوي لحد ما وقعت من طولي ونمت، ومعرفش ليه نمت تقريبًا 18 ساعة، لدرجة إني صحيت والنهار كله كان خلص..

قمت جسمي متكسر وميتة من التعب، بس فيه إحساس غريب أوي وغير مفهوم إحساس مُرعب فهمته لما بصيت في المراية، شعري مكنش موجود، شعري كله اتقص وبقيت زي الرجالة، تخيل المنظر، أنا أصلًا قبيحة وكمان من غير شعر، أول ما شوفت نفسي في المراية فضلت أصرخ زي المجنونة، مكنتش مصدقة ولا فاهمة ده أيه، وفضلت محبوسة يوم كامل في البيت مش عارفة أعمل أيه في المُصيبة دي..

وازاي ده حصل ومين اللي عمل كدا من الأساس، تاني ليلة حصلت حاجة أغرب، صحيت من نومي على ألم بشع وشديد في صباعي الصغير، ولما فتحت النور لقيت الدم نازل وضفري كله منزوع من مكانه، الألم وقتها كان لا يُطاق لدرجة إني كنت ببكي من الألم والرعب مع بعض، واتكرر الموضوع، اتكرر لحد ما اتنزعوا ضوافري العشرة كلهم في عشر ليالي، وشعري مكنش بيطلع، ثابت زي ماهو بطريقة غير مفهومة..

لحد ما زورت راجل معرفة كان يعرف أمي زمان، وحكتله كل اللي حصل معايا وقالي البنت متضايقة إنها اتدفنت ناقص منها حاجة، روحي رجعي شعرها لقبرها، ومع الرعب اللي عشته والألم والخوف من فكرة إنها ممكن تنزع صباع بعد كدا أو طرف من أطرافي روحت على قبرها، وميزة مقابرنا مالهاش حارس، فكان سهل أشيل التراب من على فتحة المقبرة وأحرك الكتلة الأسمنتية اللي قافلة باب القبر، من حظي إن مدخل القبر تراب وأسمنت مش باب حديد صغير..

ومسافة ما فتحت الباب لقيت حد واقف جوة القبر، وفي لحظتها رميت خصلة الشعر جوة وخرجت أجري، بس ورايا شوفت كلب ضخم، مقدرتش أهرب منه وعضني من رجلي عضة بشعة، وكل اللي بعد كدا أنا معرفوش..

ناس لقوني مرمية بتألم خدوني ودوني المستشفى، حقنوني ضد السُعار وخدت العلاج اللازم، ومع ذلك جالي مرض غريب ومش مفهوم، كنت بتعامل زي الكلاب وبشتهي العضم واللحم الني، بقعد في التراب قدام البيت بالأيام، الناس قالوا دي اتجننت، وبقيت عايشة على أكل الجيران اللي كانوا بيبعتوه إكراما لأمي..

وحكيت الحكاية بعد 3 سنين كاملين لما بدأت أفتكر أنا مين وأيه اللي حصل، حكتها عشان الناس تعرف إن للبيوت حُرمة عظيمة، مش من حقك تفتش في حاجة الناس أو تطيل النظر جوة البيوت أو تتدخل في حاجة مش من حقك، مينفعش تسرق حاجة أو تاخد حاجة مش مِلكك، وأخيرًا مينفعش تنتهك حرمة الأموات، لأن لو مكنست الموت واعظ هتبقا أنت الواعظ لما الناس تتحاكى باللي هيجرى فيك..

زي قصة مشهورة لواحد دخل قبر أخوه يودعه، وكان محضر إيصالات أمانة يبصمه عليها، ووقع مات جمب في نفس القبر، بلاش تاخد حاجة غيرك، واحترم البيوت واحترم الأموات..

[يَا أَيُّهَا الَّذِينَ آمَنُوا لَا تَدْخُلُوا بُيُوتًا غَيْرَ بُيُوتِكُمْ حَتَّىٰ تَسْتَأْنِسُوا وَتُسَلِّمُوا عَلَىٰ أَهْلِهَا] سورة النور

بقلم/ أحمد محمود شرقاوي

“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”

2 من 2التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى