حماتي كانت كل زيارة تيجي شقتي، تخلع شبشبها عند الباب وتحطه فوق شبشبي أنا..! في الأول كنت بقول لنفسي إنها صدفة. مرة، واتنين، وتلاتة لكن الموضوع بقى بيتكرر في كل زيارة. كنت أحيانًا أحط شبشبي في ناحية تانية، وبعد شوية ألاقيها حاطة شبشبها فوقه برضه. مرة ضحكت وقلت لها يا ماما، هو شبشبك لازم يبقى فوق شبشبي؟ ضحكت وقالت يا بنتي دي صدفة، إنتِ مكبرة الموضوع ليه؟
فعديتها.
أنا أصلًا كنت بحاول أتجنب أي خلاف معاها. من أول جوازنا وهي بتحب تحسسني إن البيت ده بيت ابنها، وإن وجودي فيه مجرد امتداد لوجوده.
كانت تدخل من غير ما تخبط، تغير أماكن حاجات في المطبخ، تفتح التلاجة وتقول
إنتوا بتشتروا حاجات كتير ملهاش لازمة.
ولو اعترضت، ترد
أنا مش غريبة هنا.
وجوزي كان دايمًا يقول
سيبيها يا حبيبتي، دي أمي.
فكنت بسيب.
لحد اليوم اللي كنت فيه في المطبخ، وابني كان قاعد في الصالة بيلعب مع جدته.
سمعته فجأة بيقول لها
تيتا، هو إنتِ ليه بتحطي شبشبك فوق شبشب ماما؟
وقفت وأنا بغسل الأطباق.
استنيت أسمع ردها.
حماتي سكتت شوية، وبعدها قالت له بصوت هادي
عشان تعرف إن ده بيتي أكتر من بيتها.
إيدي اتجمدت.
ابني ضحك وقال
بس ماما بتقول ده بيتنا.
حماتي ردت
ماما بتقول كده عشان هي مش فاهمة.
خرجت من المطبخ.
ممكن أعرف أنا مش فاهمة إيه؟
حماتي
بصتلي بسرعة، وبعدها ابتسمت.
إنتِ بتسمعي كلام طفل؟
بصيت لابني.
قول لماما تيتا قالتلك إيه.
ابني رد بكل براءة
قالت إن شبشبها فوق شبشبك عشان تعرفي إن البيت ده بيتها.
وش حماتي اتغير.
لكنها بدل ما تعتذر، قالت
هو إنتِ هتعملي مشكلة عشان شبشب؟
قلت
الموضوع مش شبشب يا ماما.
أمال إيه؟
الموضوع إنك شايفة بيتي ملكك.
ضحكت باستهانة
بيت ابننا.
الكلمة دي وجعتني أكتر مما توقعت.
بالليل، حكيت لجوزي.
كان رده متوقع
إنتِ عارفة أمي، بتتكلم وخلاص.
قلت
طب ليه كل مرة بتحط شبشبها فوق شبشبي؟
ضحك وقال
دي صدفة بقى.
ما رديتش.
لكن من اليوم ده بدأت أراقب.
ولقيت حاجات كتير ماكنتش واخدة بالي منها.
حماتي كان معاها نسخة مفتاح الشقة.
كانت تدخل أوقات وأنا في الشغل.
كانت تعرف حاجات حصلت في البيت وأنا ما حكيتش عنها لأي حد.
وفي يوم، وأنا بنضف تحت الكنبة، لقيت المفتاح.
ميدالية حماتي كانت متعلقة فيه.
استنيت جوزي يرجع.
حطيت المفتاح قدامه على السفرة.
ده إيه؟
بص عليه، وسكت.
ده مفتاح شقتنا.
قال بسرعة
أكيد مفتاح قديم.
قلت
عليه اسم ماما.
سكت تاني.
قربت منه وقلت
هي بتدخل هنا وإحنا مش موجودين؟
وقتها جوزي ما ردش.
لكن قبل ما أضغط عليه، تليفونه رن.
بص للشاشة.
كان اسم أمه.
رد.
فضل ساكت حوالي عشر ثواني.
وبعدين وشه اتغير تمامًا.
قفل المكالمة وبصلي.
وقال جملة واحدة خلتني أحس إن موضوع الشبشب والمفتاح كله كان مجرد بداية
ماما بتقول إنك لازم تسيبي الشقة لأنها باعتها من غير ما تعرفي.
حكايات بسمه
