
لما كنت بروح مع والدتي أي غُسل مكنتش بهتم بالصراخ والغُسل وحالة الحُزن الشديدة إللي كانت عند أهل الميت، ولا حتى كنت بهتم باللي أمي بتعمله واللي المفترض أتعلمه عشان أورث منها الشغلانة، الشغلانة اللي عاملة زي الإرث ولازم تتورث قبل موت صاحبها، أنا كان بيلفت نظري حاجة تانية خالص..
كنت بحاول بقدر الإمكان أدخل غرفة المتوفية، عايزة أشوف هدومها، دهبها، حالة الرفاهية اللي هي كانت عايشة فيها، وأتخيل من جوايا إنها خلاص سابت كل ده وهتروح تدفن بكفن أبيض عبارة عن حتة قماش وبس، تفكير غريب بس مكنتش بعرف أخرجه من راسي..
معرفش ليه كنت بتمنى أمي تخرج وأحنا بنغسل المتوفية عشان أتكلم معاها، اسألها عن هدومها، دهبها، وليه سابت كل ده، ولما صرحت بالأفكار دي في مرة اتقال عني مجنونة ولو كملت في السكة دي دماغي ، بس أنا مهتمتش بأي كلام وبقا عندي فضول رهيب تجاه أي متوفية، لازم أدخل أوضتها، ولازم أشوف دولابها ولبسها، بل وأوقات كنت بحاول أدور في الدولاب وهل هي عندها دهب ولا لا..
لحد ما أمي مرة لاحظت اللي بعمله، قالتلي كلمة يارتني خدت بيها كويس أوي:
ـ للبيوت حُرمة، وللميت حُرمة أكبر..
بس أنا فضلت ساكتة ومستنية الفرصة اللي هتخليني ملكة في الشغلانة الغريبة اللي خدت من تفكيري وعقلي دي، وزي أي حاجة في الدنيا لازم جيل يستلم من الجيل اللي قبله، أمي ماتت، بس الموتة بتاعتها كانت غريبة شوية..
أمي ماتت وهي بتغسل متوفية، وكانت صدمة ما بعدها صدمة بس أنا تخطتها بسرعة، يمكن عشان مكنتش بحب المثالية بتاعة أمي اللي كانت بتشتغل لوجه الله وبس، واتغسلت أمي بعد الست على إيدي واتكفنوا مع بعض واتدفنوا في نفس اليوم..
ومسكت من يومها الشغلانة رسميًا، وطبعًا كنت بطلب فلوس، أجرة مُضاعفة، وبدأت أمارس هوايتي، كنت بطلب في أي غُسل إني أغسل المتوفية في الأوضة اللي كانت بتنام فيها، بحِجة إنها لازم تودع أوضتها الوداع الأخير لأن الميت بيشتاق وبيحس وبيحتاج يودع كل حاجة قبل رحيله، كلام متعرفش تضحك بيه على عيل صغير أنا عارفة، بس الناس في البلد بتقدس أي حد شغال شغلانة ليها علاقة بالموت والمقاير والجن..
بيقدسوا الدجال، والتُربي، والمُغسل، وبتاع الأكفان، وطبعًا عشماوي بتاع غرف ، الناس بيشوفوهم مش من عالمنا، أو كانوا من عالمنا بس اللي شافوه خلاهم أقرب من العالم التاني..
عشان كدا بدأت شغلي، كنت بدخل الأوضة مع المتوفية، هي تبقا ممددة على ترابيزة الغُسل وأنا بكلمها، بسألها عن حياتها، بتكلم معاها، وبفتش في دولابها وسريرها وكل حاجة تقريبًا، وطبعًا ده بعد ما اشترط إن مفيش واحدة من أهل الميت تقف معايا، وطبعًا أي حِجة الناس هتصدقها..
بس مع الوقت بدأ شيطاني يتغلب عليا، وبقيت لما حاجة بتعجبني كنت باخدها من أوضة الميتة، عباية ممكن تعجبني من هدومها، أدوات تجميل، ومرة لقيت فلوس في الدولاب خدتها، المهم إني كنت بحب أحتفظ من كل متوفية بحاجة من متعلقاتها، حتى لو كانت ست عندها 100 سنة، يمكن كنت بستنفع منها لما بسرقها، بس الحاجة الأهم إنه تذكار، تذكار وكأني أصبت بحالة من جنون العظمة، لأني اللي بسلم الوحدة منهم لملائكة الحِساب..
لحد ما جت الليلة اللي غيرت كل حاجة تقريبًا، الليلة اللي تمنيت لو إني موت فيها وبقيت منسية في أرض الأموات، جتلي ليلتها مُكالمة من واحدة أعرفها بتطلبني أغسل بنت شابة ماتت بعد العشاء..
استغربت أوي لأن اللي بيموت بعد صلاة العشاء أهله بيستنوا لتاني يوم ويدفنوه عشان الناس تحضر الجنازة، بس طبعًا مش هجادل في موقف زي ده، لبست هدومي بسرعة وانطلقت لبيت الميتة، وعرفت إنها شابة صغيرة عندها تقريبًا 22 سنة، وعرفت إنها اللي طلبت لو ماتت بالليل تدفن بعد موتها في أسرع وقت..
طلب غريب من بنت صغيرة توقعت إنها هتموت، اللي في عمرها بيكونوا ناسيين الموت تمامًا، دخلت الأوضة لقيت ملاك على هيئة بنت، جمال غير طبيعي عمري ما شوفتها في واحدة غسلتها في حياتي، لدرجة إن جالي هاجس أغسلها وأخرج، دي مينفعش أمارس عليها هوايتي أو أفتش في حاجتها، بس خلاص كان الداء أتمكن مني تمامًا..




